Home / Aktual / Dubayda gənc Azərbaycan rəssamlarının sərgisi keçirilib

Dubayda gənc Azərbaycan rəssamlarının sərgisi keçirilib

Dubaydakı məşhur Bürc əl-Ərəb oteli yaxınlığında yerləşən, bu il rəsmi açılışı planlaşdırılan ölkəmizin BƏƏ-dəki səfirliyinin nəzdində fəaliyyət göstərən Ticarət Nümayəndəliyinin yerləşdiyi Ticarət Mərkəzində Azərbaycan Xalq Cümhuriyyətin 100 illik yubileyinə həsr olunmuş gənc Azərbaycan rəssamların sərgisinin açılış mərasimi keçirilib.

DiasporNews xəbər verir ki,səfirlik və Ticarət Nümayəndəsi aparatı ilə birgə keçirilmiş mərasimdə “Dirçəliş” Gənclərin Sosial-Psixoloji Reabilitasiya Mərkəzinin direktoru İslam Baxşəliyev, tanınmış rəssam Sakit Məmmədov, teleaparıcı və xeyriyyəçi Nuran Hüseynov (Hacı Nuran), gənc rəssamlar, BƏƏ-nin iş adamları, incəsənət xadimləri, Səfirlik, Ticarət Nümayəndəliyi və Baş Konsulluğun əməkdaşları iştirak ediblər.

Tədbirdə çıxış edən Azərbaycanın BƏƏ-ki səfiri Daşqın Şikarov Xalq Cümhuriyyəti haqqında danışıb, ADR-in varisi olan Azərbaycan Respublikasının müstəqillik qazandıqdan sonra milli mədəniyyətimizin inkişafında yeni dövrün başlanıldığını vurğulayıb. Mədəniyyətimizin ulu öndər Heydər Əliyev və onun layiqli davamçısı prezident ilham Əliyev erası ölkəmizin milli-mənəvi dəyərlərinin qorunması, təbliği və inkişafı ilə xarakterizə olunduğunu qeyd edib. Bildirib ki, milli mədəniyyətimizin təbliğinə dair ulu öndərin ideyalarının həyata keçirilməsində ölkəmizin birinci-vitse prezidenti Mehriban Əliyevanın başçılıq etdiyi Heydər Əliyev Fondunun müstəsna xidmətləri var. Heydər Əliyev Fondu tərəfindən həyata keçirilmiş genişmiqyaslı layihələr Azərbaycanın zəngin mədəniyyətinin dünyada geniş təşviqini təmin edib. D.Şikarov sərginin Azərbaycan mədəniyyətinin təbliği ilə yanaşı, eyni zamanda ölkələrimiz arasında münasibətlərin inkişafına da xidmət edəcəyini deyib. Eyni zamanda diplomat ikitərəfli Azərbaycan-BƏƏ münasibətlərinə də toxunaraq əlaqələrin bütün sahələrdə uğurla inkişaf etdiyini bildirib.

Azərbaycanın BƏƏ-ki ticarət nümayəndəsi Elnur Əliyev öz nitqində yaxın zamanda Dubayda ölkəmizdə istehsal olunan malları təşviq edən və eyni zamanda ikitərəfli iqtisadi münasibətlərə təkan verəcək Azərbaycan Ticarət Evinin açılışının planlaşdırıldığını vurğulayıb. Bildirib ki, Ticarət Evi nəzdində Azərbaycan istehsalı olan məhsulların satışı, nümayişi və marketinqi mərkəzi, həmçinin Azərbaycan mətbəxinin bu ölkədə daha da tanıdılması və burada yaşayan azərbaycanlı icmanın toplaşmasına şərait yaratmaq məqsədilə “Azərbaycan Evi” adlı restoran və kafe fəaliyyət göstərəcək.

Sərgidə iştirak edən ölkəmizin Dubaydakı baş konsulu Cavidan Hüseynov Azərbaycanın zəngin mədəniyyəti, incəsənəti haqqında danışmış, sərginin Azərbaycan mədəniyyətinin tanıdılması istiqamətində aparılan tədbirlərin tərkib hissəsi olduğunu vurğulayıb.

“Dirşəliş” Gənclərin Sosial-Psixoloji Reabilitasiya Mərkəzinin direktoru İslam Baxşəliyev başçılıq etdiyi qurumun fəaliyyətindən söz açıb, Mərkəzin dünyanın bir sıra ölkələrində bu kimi sərgilərin keçirtdiyini, bunun Azərbaycan mədəniyyətinin tanıdılması ilə yanaşı, gənc rəssamlar üçün güclü stimul olduğunu bildirib.

Rəsmi açılış mərasimin sonunda səfir Daşqın Şikarov və ticarət nümayəndəsi Elnur Əliyev gənc rəssamlara fəxri diplomlar təqdim ediblər. Sərgiyə gəlmiş qonaqlara milli mətbəximizə məxsus şirniyyatlar, Azərbaycan istehsalı olan digər məmulatlar təklif olunub. Sərgi zamanı Nuran Hüseynov, Təranə Salmanova və Leyla Qurbanova Azərbaycan milli musiqi şedevrlərini royalda ifa ediblər.

DiasporNews

Check Also

Lüksemburqda azərbaycanlı rəssamın fərdi sərgisi açılıb

Azərbaycanın Belçika Krallığı və Lüksemburq Böyük Hersoqluğundakı səfirliyi və Lüksemburqda fəaliyyət göstərən “Qarabağ” Azərbaycan Mədəniyyət …