Home / Aktual / Tehran şovinistlərindən Bakıya təxribat: “Artsaxe…” – Video

Tehran şovinistlərindən Bakıya təxribat: “Artsaxe…” – Video

Tehranın “Azadi” stadionunda noyabrın 25-i baş tutan “Perspolis” – “Traktor” qarşılaşması zamanı meydan sahiblərinə dəstək üçün gələn iranlı azarkeşlər Azərbaycana qarşı təxribata əl atıb. Onlar oyundan öncə “Traktor” azarkeşlərinin, eləcə də Azərbaycan vətəndaşlarının heysiyyatına toxunan video yayımlayıb. Videoda əllərində Qarabağın ermənicə qondarma adı yazılmış lövhə tutan 3 nəfər oyunda “Artsaxe erməni” şüarını səsləndirəcəklərini bəyan ediblər:

“Bazar günü (25 noyabrdakı matç nəzərdə tutulur – red.) stadiona gedəcəyik və pantürklərin “Xəlic-i ərəbi” (“Ərəb körfəzi”. Təbrizli azarkeşlər tehranlıları qıcıqlandırmaq üçün Fars körfəzini Ərəb körfəzi adlandırırlar ) şüarları qarşısında “Artsax erməni” şüarı səsləndirəcəyik ki, bu da Qarabağın düzgün adıdır: “Artsaxe erməni!..”

Videoda Qarabağ sakinlərinin səfalət içində yaşadığını əks etdirən görüntülər də göstərilib. Görüntülərdə səfalət içində yaşayan insanların durumunda Bakı günahlandırılır: “Qarabağda zülm altında yaşayan insanları görün. Onlar Bakının Qarabağı iqtisadi mühasirəyə alması səbəbindən ağır durumda yaşayır. Biz hamımız Bakının pantürklərinin əməllərini pisləyirik. Hamımız “Artsax” şüarı səsləndirəcəyik!”

Qeyd edək ki, “Perspolis” – “Traktor” qarşılaşmaları zamanı oyun stadionda səsləndirilən sərt şüarlarla yadda qalır. Soydaşlarımız oyunlar zamanı mədəni haqlarını, qadın azadlığını tələb edir, “Azərbaycan var olsun – İstəməyən kor olsun”, “Türk dilində mədrəsə – olmalıdır hər kəsə”, “Ya Qarabağ, ya ölüm”, “Öl desən, ölərəm mən” kimi şüarlar səsləndirirlər. Farslar isə qarşılığında “Ölüm olsun türkə”, “Eşşək türk” və nəlayiq ifadələr işlədərək azarkeşləri hövsələdən çıxarırlar.

Əlbəttə, Təbriz və Tehran azarkeşlərinin bir-birinə qarşı atmacalarında nə qədər aşağılayıcı və milli heysiyyata toxunan məqamlar olsa da, bu, ölkədaxili məsələdir və müstəqil Azərbaycan Respublikasına aidiyyəti yoxdur. Ancaq Tehran azarkeşlərinin bu tip açıqlaması birbaşa ölkəmizə qarşı təxribatdır.

Əslində, “Artsax” adının da ermənilərə heç bir aidiyyəti yoxdur. “Qarabağ” adından imtina etməyə cəhd göstərən separatçılar guya “Artsax” adından istifadə ilə bu ərazini özününküləşdirəcəklərini zənn edirlər.

Halbuki “Artsax/arsax/arsak” sözü qədim türk tayfası olan sakların adı ilə bağlıdır və “igid sak”, “ər sak”, “sak kişisi” mənalarını verir. E.ə. II əsrdən etibarən indiki Qarabağ ərazisi və ondan cənubda olan (Cənubi Azərbaycan) bəzi ərazilər Arsak adlanırdı. Sonradan Qarabağ toponiminin işlədilməsi “Arsak” sözünü sıxışdırdı. Lakin hələ də “Qarabağ” sözü ilə paralel olaraq işlədilməkdədir. Arsax (antik mənbələrdə Orxistana) vilayəti sağ sahil Albaniyasının (Hazırda Qarabağın dağlıq hissəsi və Mil düzü) əyalətlərindən biri idi. Arsax əhalisini albanlar, qarqarlar, hunlar, xəzərlər, barsillər təşkil edirdi.

VIII əsrin əvvəllərindən etibarən Albaniya katolikosluğunun yerləşdiyi ərazi – Qarabağın dağlıq hissəsi knyazlıq, hökmranlıq mənasında “Arşax” və ya “Arsax” adlanmışdır. Bu isə təsadüfi deyil, çünki Albaniyada I əsrin ortalarında hakimiyyətə gəlmiş çar I Vaçaqanın nəslindən olan Arşakilər sülaləsinin hökmdarları “arşax”, VI əsrdən VIII əsrin əvvəlinədək hakimiyyətdə olmuş Mehranilər sülaləsinin hökmdarları isə “arşax” – “aranşax” adlanmışdır.

Alban dövlətinin süqutundan sonra patriarxlığın mərkəzi Arsaxa keçir və Arsak – Xaçın knyazlığı yaranır. Qədim Albaniyanın bir hissəsi olan bu knyazlıq Xaçınçayın və Tərtərçayın hövzələrini əhatə edirdi. Mənbələrdə Arsax “möhkəmləndirilmiş vilayət”, “möhkəm ölkə” adlanırdı. Türkcə izah olunduğu halda, bu söz nə qədim, nə də müasir erməni dilində heç bir məna ifadə etmir.

Onu da xatırladaq ki, Ermənistanın Azərbaycan torpaqlarını işğalda saxlamasının əsas səbəblərindən biri də İrandır. Azərbaycanın bu vaxta qədər iqtisadi-siyasi və hərbi həmlələrinə Ermənistan İranın aktiv iqtisadi dəstəyi ilə dözür. Həmçinin, İran şirkətlərinin Dağlıq Qarabağda qanunsuz fəaliyyəti, işğaldakı ərazilərimizdə təbii sərvətləri taladığı da məlumdur və təəssüf ki, bu proses davam edir. Yayılan video ilə bağlı İranın Azərbaycandakı səfirliyinə sorğu verilib.(Axar.az)

DiasporNews

Check Also

Ukraynada Heydər Əliyev anılıb

Ukraynada fəaliyyət göstərən Azərbaycan diaspor təşkilatlarının rəhbərləri və fəallarının iştirakı ilə Ümumilli lider Heydər Əliyevin …