İyunun 3-dən 5-dək Belarus Respublikasının Qrodno şəhərində XIII “Milli mədəniyyətlər” festivalı keçirildi.
Bu haqda “Diaspornews.az“a Belarusun “Azərbaycan İcmaları Konqresi”ndən məlumat verilib.
Festivalın əsas məqsədi millətlərarası münasibətlərin daha da möhkəmlənməsi, musiqinin, poeziyanın, xoreoqrafiyanın, incəsənət və sənətkarlıq nümunələrinin, xalqların milli mətbəxinin nümayişinə yönəlmişdi. XIII Respublika Milli Mədəniyyətlət festivalı 30 ölkədən 800 iştirakçını bir araya gətirərək meydanda yürüşlə şəhərin qonaqlarını və sakinlərini salamladı. Yürüş ən parlaq məqamlardan birinə çevrilərək, hər zaman ətrafına çoxlu tamaşaçı toplayan və eyni zamanda birlik nümayiş etdirən ən gözəl nümunədir. Yürüşün ilk sırasında azərbaycanlı nümayəndələr gedirdi. Burada Azərbaycanın Belarusdakı Səfiri Ülvi Baxşaliyev, Belarusun “Azərbaycan İcmaları Konqresi”nin sədri Natiq Bağırov, konqresin digər üzvləri, diaspor nümayəndələri, gənclər təşkilatı və Belarus Respublikasında yaşayan həmvətənlərimiz var idi.
Festivalın rəsmi hissəsində dövlət qurumlarının nümayəndələri; Belarus Respublikasının dövlət katibi Volfoviç A.Q., baş nazirin müavini Petruşenko İ.V., mədəniyyət naziri Markeviç A.M. qonaqları və iştirakçıları salamlayaraq onları bayram münasibıti ilə təbrik etdilər. Qrodno şəhər icraiyyə komitəsinin sədri Vladimir Karanik öz nitqində “Keçirilən festivala insanların ruhu qoyulub. Burada qonaqlar, tamaşaçılar yoxdur, burada hamı iştirakçıdır! Bizi öz qəlbinizə buraxmağa hazırsınızmı?” – deyərək konserti açıq elan etdi.
Konsertin ilk çıxışı da azərbaycanlıların iştirakı ilə oldu. Olesya Kosoykinanın, Davud Zakirzadənin rəhbərlik etdikləri “Sarı gəlin”, “Odlar” rəqs ansambllarının çıxışları, Günəşin ifa etdiyi “Ayrıllq” mahnısı alqışlarla qarşılandı. Festivalın birinci günü atəşfəşanlıqla sona yetdi.
Festivalın ikinci günü ilk növbədə iştirakçılara Belarus mədəniyyət nazirliyi tərəfindən fəxri fərmanların verilməsi ilə başladı. Belarusun “Azərbaycan icmaları konqresi”nin gənclər təşkilatının rəhbəri, eyni zamanda “Sarı gəlin” rəqs qrupunun rəhbəri Olesya Kosoykina da «Milli mədəniyyətin populyarlaşmasına mühüm töhfəsinə görə” fəxri fərmanla təltif olundu. Şəhərin mərkəzi hissəsində hər bir ölkənin mədəniyyətini, musiqisini, rəqslərini, mətbəxini nümayiş etdirmək üçün xüsusi yerlər müəyyən edilib hazırlanmışdı. Burada nümayiş olunan hər bir xalqın özünəməxsus nümunələri heyrətedici idi. Azərbaycana ayrılan hissədə ölkəmizin, Qarabağın gözəlliklərini təmsil edən tablolar, “Şuşa Azərbaycanın mədəniyyət mərkəzidir” adlı plakat və milli nümunələri əks etdirən sərgi marağa səbəb oldu.
Qonaqlar Azərbaycan mətbəxi ilə də tanış oldular, müxtəlif çeşidli yeməkləri və şirniyyatları dequstasiya etdilər.
Festivalın yekun hissəsi Avqustos Kanalında хüsusi proqramla sona çatdı.
Festivalla bağlı Belarusun “Azərbaycan İcmaları Konqresi”nin sədri Natiq Bağırov öz təəssüratlarını bölüşüb: “Belarusun “Azərbaycan İcmaları Konqresi” Belarus Respublikasının 13-cü “Milli mədəniyyətlər” festivalında Azərbaycanı layiqincə təmsil edib. Bütün iştirakçılara və diaspora dəstəyinə və həmrəyliyinə görə Azərbaycan Respublikasının Belarus Respublikasındakı Fövqəladə və Səlahiyyətli Səfiri cənab Ülvi Baxşəliyevə xüsusi təşəkkürlər”.
