Dekabrın 6-da Küveyt Dövlətinin “Hissa Əl Hanif” orta məktəbində şagirdlər arasında “Dünya dövlətlərinin mədəni irs tarixi” adlı layihə çərçivəsində təqdimat keçirilib. Bu haqda saytımıza Küveytdə fəaliyyət göstərən “Vətənsevər” Azərbaycan-Küveyt Mədəniyyət və Dostluq Cəmiyyətinin sədri Könül Hacızadə məlumat verib.
Təqdimatda şagirdərin hər biri ayrı-ayrı dövlətlər haqqında hazırladıqları layihələr haqqında ingilis dilində çıxış edib. Məktəbin 9-cu sinif şagirdi Leyla Əl Avadi öz növbəsində ingilis dilində hazırladığı “Azərbaycan-Ana Vətənim” adlı layihəsini təqdim edib. Leyla Əl Avadi 1918-ci ildə yaradılan və cəmi 11 ay sürən, yenidən 1991-ci ilin 18 oktyabrında əldə etdiyimiz müstəqilliyimiz haqqında və Azərbaycanın müstəqilliyinin əbədi olacağı, güclü dövləti, güclü ordusu, güclü xalqı olduğu haqqında danışıb.
O, Azərbaycanın milli mədəniyyəti, milli mətbəxi, tarixi, yeraltı və yerüstü sərvətləri, neft qaz ölkəsi olmağı haqqında, 1992-ci ilin 26 fevralında ermənilər tərfindən törədilmiş Xocalı soyqırımı, bu soyqırımıda bir gecənin içində vəhşicəsinə edilən qətliamdan, o zamanlar erməni həkimi Zori Balayanın Xocalıdan əsir apardıqları 7-13 yaşlı qız uşaqlarının diri-diri dərisinin soyularaq vəhşicəsinə qətlə yetirdiklərini və eləcə də hamilə qadınların qarnını yarıb uşaqları öldürdüklərindən, bir sözlə, erməni vəhşiliyindən bəhs edib.
1990-cı ilin 20 yanvar gecə keçmiş sovet ordusunun Azərbaycana tanklarla daxil olaraq öz müstəqilliyini istəyən Azərbaycan xalqına qarşı törətdikləri qətliam və həmin il avqust ayının 2-də sübh tezdən Səddam Hüseyin tərəfindən Küveytin işğalından, işğal nəticəsində 650 nəfərin şəhid olmasından, 9 ay neftin yanması və eləcə də Azərbaycanın əslər boyu neft üzrə təcrübəsi olduğundan Küveyt neftinin söndürülməsində öz köməkliyini əsirgəməyən ölkələrdən biri olduğunu bildirib. Məktəb şagirdi 90-cı illərdə Ulu Öndər Heydər Əliyev tərəfindən təməli qoyulan və hal-hazırda Cənab Prezidentimiz İlham Əliyevin yaratdıqları dostluq münasibətindən danışıb. Həmçinin Küveyt Dövlətindəki Azərbaycan səfirliyinin, o cümlədən Küveytdə yaşayan, çalışan Azərbaycan vətəndaşlarının, diasporun işin nəticəsində iki ölkənin daha da yaxın dostluğundan, ticari və turizimçiliyindən, eləcə də iki ölkənin din qardaşı olmasından bəhs edib.
O cümlədən ermənilərin 1988-ci ildən başlayaraq 30 il işğal altında saxladıqları torpaqlarımızın 2020-ci il 27 sentyabrdan başlayaraq Ali Baş Komandanın əmri və müzəffər Azərbaycan Ordusunun qəhrəmanlığı ilə 3 min şəhid verərək 44 gün ərzində azadlığa qovuşması haqqında danışıb. Eləcə də Möhtərəm Prezidentimizin sərəncamı ilə gözəl Şuşamızın Azərbaycanın mədəniyyət paytaxtı elan edilməsi haqqında, ermənilərin vəhşicəsinə Qarabağı darmadağın edərək hər tərəfi minalaması və hələ də minalanmış ərazilərin xəritəsini verməməsini məktəb yoldaşlarına, o cümlədən müəllim və müdriyyət qarşısında qeyd edib. Şagird hal-hazırda Qarabağda bərpa-quruculuq işləri aparıldığını və minalanmış ərazilərin təmizlənməsindən bəhs edib.
Qeyd edək ki, məktəbin şagirdi Leyla Əl Avadi layihəni təqdim etdikdə Azərbaycanın milli geyimində şanlı üç rəngli bayrağımıza sarılıb, Xarıbülbül gülü formasında olan nişanın Qarabağın və Zəfərimizin simvolu olmasından danışaraq yaxasında əks etdirib. Sonda Azərbaycan və ingilis dillərində “YAŞASIN AZƏRBAYCAN! YAŞASIN AZƏRBAYCAN PREZİNDENTİ və ORDUSU !”, “QARABAĞ AZƏRBAYCANDIR” deyərək layihəni tamamlayıb.
Xatırladaq ki, Leyla Əl Avadi “Vətənsevər” Azərbaycan-Küveyt Mədəniyyət və Dostluq Cəmiyyətinin sədri Könül Hacızadənin qızıdır.
