Qırğızıstan prezidenti Sadır Japarov ölkənin sosial-iqtisadi, intellektual və mədəni potensialının inkişafında mühüm xidmətləri olan, habelə peşə fəaliyyətində yüksək nəticələr əldə edən vətəndaşlara dövlət mükafatlarını təqdim edib.
“Diaspornews.az” xəbər verir ki, “Əməkdar mədəniyyət xadimi” fəxri adına layiq görülənlər arasında Almatı və Bişkek Mərkəzli “Türkel” Media Qrupunun rəhbəri, Qırğızıstanın “Piramida” Dövlət televiziya kanalında efirə gedən həftəlik “Dostluq körpüsü” verilişinin müəllifi və aparıcısı Hökumə Xəlilova da var. Dövlət başçısı bununla bağlı döş nişanı və vəsiqəni H.Xəlilovaya təqdim edib.
H.Xəlilova ölkənin ictimai-siyasi və mədəni həyatındakı xidmətlərinə görə bu mükafata layiq görülüb.
Prezident dövlət mükafatına və fəxri ada layiq görülənləri təbrik edib, onlara gələcək fəaliyyətlərində uğurlar arzulayıb.
