Azərbaycan Respublikasının Əməkdar артисти Xanlar Bəşirov ilk dəfə olaraq Moskva və Sankt-Peterburqda açıq rəqs ustad dərsləri keçirir. “Xəzər” Azərbaycan ansamblı tərəfindən təşkil olunan bu layihə Rusiyanın müxtəlif bölgələrində Azərbaycan rəqs sənətinin təbliğini hədəfləyir. Moskvada keçirilən dərslərdə Rusiyanın və Belarusun müxtəlif regionlarından xoreoqraflar iştirak ediblər. Üç gün davam edən intensiv məşğələlərdə Xanlar müəllim Azərbaycan rəqslərinin tarixi haqqında danışıb, “Şələqoy”, “Qaytağı”, “Yallı” kimi məşhur rəqslərdən əsas hərəkət və kombinasiyaları nümayiş etdirib.
Layihənin müəllifi, “Xəzər” ansamblının rəhbəri Nurlan Zərbalıyev bildirib ki, Rusiyada Azərbaycan rəqslərinin düzgün öyrədilməsi üçün məhz belə mütəxəssislərə ehtiyac var.
“Xanlar müəllim bizim ağsaqqalımızdır. O, hər zaman kömək edən, yol göstərən insandır. Çox şadam ki, onu bura dəvət etmək üçün xüsusi israr etməyə ehtiyac olmadı. O özü təcrübəsini və biliklərini bölüşməyə hazır idi. Onunla tanış olmaq və söhbət etmək belə buraya gələn hər kəs üçün böyük fürsətdir”, – deyə Nurlan Zərbalıyev qeyd edib.
Sonuncu dəfə peşəkar Azərbaycan rəqsləri Moskvada 9 il əvvəl təqdim olunmuşdu. Həmin vaxt Çaykovski adına konsert zalında Dövlət Azərbaycan ansamblının “Mənim Azərbaycanım” proqramı nümayiş etdirilmişdi. Layihənin prodüseri, ictimai xadim Kəmrən Rüstəmzadə vurğulayıb ki, Xanlar Bəşirov Azərbaycan rəqslərinin Rusiyada populyarlaşmasında böyük rol oynayıb.
“Onun ifalarından Rusiyada fəaliyyət göstərən aparıcı Azərbaycan kollektivlərinin xoreoqrafları öyrəniblər. Xanlar müəllimi Krasnoyarskda çox sevirlər. O, “Odlar Yurdu” kollektivinin formalaşmasında böyük rol oynayıb və bu kollektiv mədəniyyətimizi xaricdə layiqincə təmsil edir. Sankt-Peterburqdakı “Xəzər” ansamblının üzvləri dəfələrlə Azərbaycana gələrək bu cür görkəmli sənətkardan təcrübə toplayıblar. Bu ustad dərsi xalqlar arasında mədəniyyətin birləşdirici gücünün əsl nümunəsidir”, – deyə o bildirib.
Ustad dərsinin qonaqlarından biri də Rusiyanın Xalq артисти Dikalı Muzakayev olub. O qeyd edib ki, Azərbaycan rəqsləri ölkənin mədəniyyətinin incilərindən biridir və Xanlar Bəşirov kimi sənətkarlar çox önəmlidir.
“Məndən Azərbaycan rəqsinin nə olduğu soruşulanda ilk olaraq Xanlar Bəşirovu xatırlayıram. O, bunu öz həyatı və zəhməti ilə qazanıb”, – deyə Dikalı Muzakayev bildirib.
Xanlar Bəşirov özü isə ümid etdiyini bildirib ki, bu dərslər gələcəkdə Rusiyada yeni və uğurlu Azərbaycan kollektivlərinin yaranmasına kömək edəcək.
“Məni bu ustad dərslərinə dəvət edən bütün təşkilatçılara təşəkkür edirəm. Mən çalışıram ki, Azərbaycan rəqsləri düzgün təqdim olunsun və insanlar onları düzgün ifa etsinlər. Rəqslər bizim böyük sərvətimizdir. Onları qorumaq, öyrənmək və gələcək nəsillərə ötürmək lazımdır. Şagirdlər çox çalışqandır, bu məni sevindirir. Ümid edirəm ki, bu layihədən sonra rəqslərimiz moskvalılar üçün daha doğma olacaq”.
Xanlar Bəşirovun Azərbaycan rəqsləri üzrə ustad dərsləri 30 aprel – 3 may tarixlərində Sankt-Peterburqda davam edəcək.
