Avstraliyanın Sidney şəhərində Türkiyə Cümhuriyyətinin yaradılmasının 100-cü ildönümü münasibətilə keçirilən təntənəli bayram tədbirində Azərbaycan icması fəal iştirak edib.
Yeni Cənubi Uels (NSW) ştatı üzrə Multikultural Nazirliyin dəstəyi, bir sıra türk təşkilatlarının və Avstraliya Azərbaycanlıları Assosiasiyasının birgə təşkilatçılığı ilə baş tutan tədbirdə Avstraliya-Azərbaycan Türk Dostluq Birliyi, Avstraliya Azərbaycanlılarının Mədəniyyət Assosiasiyası və diaspor fəalları iştirak ediblər.
Xalqımızın zəngin mədəni irsinin və milli mətbəx nümunələrinin nümayiş etdirildiyi Azərbaycan guşəsini ölkəmizin Avstraliyadakı, eyni zamanda Yeni Zelandiya və Fici Respublikasında akkreditə olunmuş səfirliyinin müvəqqəti işlər vəkili Vaqif Cəfərov, Türkiyənin Avstraliyadakı səfiri Ufuk Gezer, Türkiyənin Sidneydəki Baş konsulu Ali Sevim, Yeni Cənub Uels ştatının Mədəniyyət Nazirliyinin, parlamentinin və şəhər bələdiyyəsinin təmsilçiləri ziyarət ediblər.
Sidney şəhərindəki Türk Evindən başlanan və Wyatt Park Lidcombe ünvanınadək davam edən təntənəli yürüş zamanı Türkiyə və Azərbaycan bayraqları dalğalandırılıb.
