Aprelin 22–də Bağdad Universitetinin Dilçilik fakültəsinin dekanı professor doktor Əli Adnan Məşuşun himayəsi ilə fakültənin Rus dili bölməsi illik mədəniyyət festivalını təşkil edib. Diaspornews.az xəbər verir ki, tədbirdə Rusiya Federasiyasının İraq Respublikasındakı fövqəladə və səlahiyyətli səfiri İlbrus Kirilloviç Kotraşev və Bağdaddakı Rusiya səfirliyinin nümayəndə heyəti, İraqda yaşayan tanınmış azərbaycanlı professor, travmatoloq-ortoped Hüseynəli İsmayılov, həmçinin fakültənin müəllimləri və tələbələri iştirak ediblər.
Fakültə rəhbərliyi səfiri və onu müşayiət edən nümayəndə heyətini səmimi akademik və mədəni mühitdə qarşılayıb. Bu tədbir Rus dili bölməsi tərəfindən təşkil olunan mədəni gün çərçivəsində keçirilib və iki tərəf arasında elmi-mədəni əlaqələrin dərinliyini əks etdirib.
Festival fakültə dekanının çıxışı ilə açılıb. O, qonaqları salamlayaraq Rusiya səfirliyi və rus universitetləri ilə səmərəli əməkdaşlığı yüksək qiymətləndirib, bu əməkdaşlığın elmi və mədəni fəaliyyətlərin inkişafına, eləcə də beynəlxalq mədəniyyətlərə açıq olmağa töhfə verdiyini vurğulayıb.
Festival çərçivəsində müxtəlif bədii və ədəbi proqramlar təqdim olunub. Bunlara teatr və musiqi çıxışları, həmçinin rus dilində şeir qiraətləri daxil olub. Tədbirdə müəllim və tələbələrin fəal iştirakı ilə rus ədəbiyyatı və mədəniyyətinin müxtəlif cəhətləri nümayiş etdirilib və tamaşaçıların böyük marağına səbəb olub.
Festival Rus dilində tələbələrin ifa etdiyi kollektiv mahnı ilə yekunlaşıb və tədbirə xüsusi bayram əhval-ruhiyyəsi qatıb. Səfir isə öz növbəsində festivalın yüksək səviyyədə təşkil olunmasından məmnunluğunu ifadə edib, proqramın zənginliyini və tələbələrin yüksək dil səviyyəsini xüsusi qeyd edərək müəllimlərin əməyini yüksək qiymətləndirib.
Rus dili bölməsinin rəhbəri professor doktor Nəcva Fuad da tələbələrin nümayiş etdirdiyi elmi və dil səviyyəsini yüksək dəyərləndirib, bölmənin dil və mədəni bacarıqların inkişafına, eləcə də müxtəlif mədəniyyətlər arasında əlaqələrin möhkəmləndirilməsinə xüsusi önəm verdiyini vurğulayıb.
